Sundag 27. april viste Publika TV, ein av dei største på nyheiter i Moldova, reportasje om Hans Bjørn Bakketeig og arbeidet for synshemma.
Start opptaket ved å klikka på den kvite trekanten i bildet merka med PUBLIKA.MD oppe til høgre. Innslaget kjem etter intro på 2 minutt og 18 sekund:
Synssenteret 25. april 2014: Åtte utleveringar av briller pluss ein utredning. Ein slags rutinedag for Tatiana, Stela, Ludmila og Hans Bjørn, men ein merkedag i livet for pasienten. Den som ser, er inne, den som ikkje ser, er ute. Synssenteret hjelper menneske inn. Visjonen er: Alle skal med!
Bildet: Bogdan (2) med nye briller på pappas fang.
Ungjenta Ane Tveit kom til Moldova første gong i 1999. Ho vart rysta over det ho såg på ein barneheim for funksjonshemma i Hincesti. Hennar engasjement for borna bana veg for organisasjonen Voinicel som i dag flytta inn i fantastiske nye lokale. Her kan born frå heile Moldova få hjelp, trening og stimulering av personale med god utdanning, lang erfaring; og ikkje minst med eit eineståande engasjement for dei små.
Bildet: Ane Tveit, tilbake i Moldova 15 år etter, leia opningsseremonien.
Tove Bruvik Westberg er ny norsk ambassadør til Romania og Moldova. Onsdag 23. april inviterte ho nordmenn på oppdrag i Moldova til mat og prat på ein triveleg restaurant i Chisinau. Ambassadøren seier at det som gjer henne mest stolt på jobben, er det arbeidet hennar landsmenn utfører i landa ho er den norske staten sin representant.
Bildet: Hans Bjørn Bakketeig, leiar for Hjelp Moldova, nytta høvet til å gje ambassadøren eit eksemplar av BT-magasinet med fyldig omtale av arbeidet i Moldova.
Det er vår i Moldova. Då er Mo vakrast . Orhei, dit vi drog hin dagen, er kanskje dem mest kjende regionen i landet. Frå eldste tider var det her folk som for mellom aust til vest, møttest. Landskapet slynger seg i bølgjer og linjer; vennleg, inviterande mystisk og spennande.
For oss der oppe frå, er Moldova motsats til fjord og fjell.
Familien Bezer er stor, eit heilt fotballag med reserve, 12 i talet. Berre to ser. Borna kjem til verda utan regnbogehinner. Det kan best samanliknast med at auga ikkje har blendaropning som regulerer for lyset. Dagslys smertar, og endå verre er det om sola skin.
Bildet: To brør, 29 og 26, to fedre i ein familie utan syn.
-I alle år som augelege har eg drøymt om dette. Trudde knapt eg skulle få draumen oppfylt medan eg enno er i arbeid!
I fjor haust var dr. Raisa Sirbu mellom deltakarane på eitt av kursa i serien av kurs Hans Bjørn og Tatiana held for augelegar frå heile Moldova. No har dr. Raisa og poliklinikken hennar i Orhei fått nytt og moderne utstyr.
Bildet: Raisa Sirbu har bytt ut det gamle “retinoskopet”, eit lysreflekterande speil med eit ørlite kikehol i sentrum, med eit moderne retinoskop. Retinoskop er eit instrument for å undersøkja brytningen i auga.
Tysdag 22. april starta TV Publika opptak med og om Hans Bjørn og arbeidet for synshemma i Moldova. I morgon, 23. april, følgjer TV-teamet Hans Bjørn til byen Orhei nokre mil nord for hovudstaden Chisinau. På agendaen står visitt heime hjå ein familie der alle elleve i husstanden er blinde eller svaksynte, samt besøk på det lokale sjukehuset der augelegane tidlegare har fått opplæring på fagfeltet synshemma, pluss tilført utstyr for diagnostisering.
Bildet: Hans Bjørn Bakketeig sett gjennom kameralinsa til TV Publika.
Håvard Austad i Utanriksdepartementet lovar støtte til Hjelp Moldova i arbeidet med å få i stand bindande avtale med moldovske styresmakter. I første omgang gjeld det å skaffa tenlege lokale for Synssenteret; på sikt å involvera styresmaktene i drifta. Tysdag 21. april gjesta Austad Hjelp Moldova i hovudstaden Chisinau der han fekk ei solid orientering om arbeidet med og for synshemma.
Bildet: Håvard Austad
Les heile artikkelen, og sjå video, om Hans Bjørn Bakketeig og arbeidet for og med synshemma i Moldova.
Klikk under på…
