I seks år har Hjelp Moldova jobba for skaffa tenlege lokale til Synssenteret. Fleire gonger trudde me at målet var nådd. Like mange gonger har me vorte skuffa. Likevel vonar me på ein snarleg avtale med styresmaktene i Moldova. . Bildet: Helseministrane Usati og Høie signerer samarbeidsavtalen. (Foto frå HOD). I 2014 underteikna helseministrane Usati frå Moldova og Høye frå Norge ein samarbeidsavtale, eller "Memory of Understanding" (MoU). Hjelp Moldova sitt arbeid med og for synshemma oppfyller intensjonane i avtalen. No lovar norske helsestyresmakter i ly av avtalen å bidra til at vårt behov for større og meir tenlege lokalitetar kan gå i orden.  

- Me ønskjer nærare samarbeid med norske HOD for å leggja endå meire trykk på helsestyresmaktene i Moldova, seier Hans Bjørn Bakkerteig; her i samtale med sr rådgjevar Maren Ringstad Widme (til venstre) og avdelingsdirektør Nina Horg Thoresen.

Tidlegare denne månaden var Hans Bjørn Bakketeig og underteikna på møte i Helse- og Omsorgsdepartementet (HOD) i Oslo. Dette var vårt andre møte med HOD etter at den norske helseministeren Bernt Høie og den dåverande moldovske helseminister Usati i 2014 underteikna eit sokalla Memorandum of Understanding (MoU) - ein samarbeidsavtale på helsefronten mellom dei to landa. Nina Horg Thoresen, avdelingsdirektør i Seksjon for internasjonalt samarbeid, tok godt mot oss saman med sr rådgjevar Maren Ringstad Widme. Me opplevde at departementet hadde god kunnskap om arbeidet vårt i Moldova og den betydning det har for dei synshemma i landet. Hans Bjørn orienterte om arbeidet vårt med å etablera system og tenester for synshemma i Moldova, og om dei aktuelle problemstillingane me står overfor no. Særleg la me vekt på betydningen av at Synssenteret snarast må få tenlege lokale for driva ei forsvarleg nasjonal augehelseteneste i den moldovske republikken. Det er vårt mål og ønskje å etablera eit godt samarbeid med norske helsstyresmakter slik at me gjensidig kan arbeida for å oppfylla intensjonane i samarbeidsavtalen. Hans Bjørn viste mellom anna til det fine samarbeidet me har med NORLAM i Moldova, og dei gode erfaringane begge partar har som følgje av det. NORLAM arbeider med å reformera lovverk og fengselsvesen i Moldova. Hjelp Moldova er engasjert av NORLAM for å ivareta synshelsa til insette i moldovske fengsel. Me opplevde å få god støtte og tilslutning til tankane våre, og representantane for HOD lova å gjera sitt til at me snarast råd kan få ein avtale med moldovske styresmakter når det gjeld tildeling av lokale. Representantar for HOD reiser til Moldova den 19. oktober, og ønskjer då å få møta Hans Bjørn og Tatiana, og om mogeleg besøkja synssenteret. Prioriterte samarbeidsområde mellom Norge og Moldova kjem til å vera på områda sjukehusorganisering, primærhelseteneste/heimehjelp og førebyggande helsearbeid. .   Tekst og foto: Kåre Ness